غَـــــــزل
کاغذ تے اُترِیج کے تیڈو ول ائے ہیں
اساں ہُݨ سِمٹیج کے تیڈو ول ائے ہیں
اینجھا سخت وی کائنا ہا پندھ جیوݨ دا
کیوں آخر پتھریج کے تیڈو ول ائے ہیں؟؟؟
توں وی وِتھ کوں جھاڳݨ دا کوئی سایُو کر
اساں وی گِھلکِیج کے تیڈو ول ائے ہیں
اوپَری بھوئیں تے ساڈا دل نہ لگدا ہا
شکر ہے یار تَھݙیج کے تیڈو ول ائے ہیں
بالکل این٘ویں اِستری تھی کے ڳئے ہاسے
ہُݨ جیویں مُچڑیج کے تیڈو ول ائے ہیں
ساکوں تاں حالات پَڑھیندے رہ گئے ہِن
ہک ہک شے سمجھیج کے تیڈو ول ائے ہیں
کوئی ہک موج وی ساڈے حق اچ کائنا ہئی
ہر پاسو چَھنڈکیج کے تیڈو ول ائے ہیں
کہیں سَت رنگی پِینگھ کوں سُودَھݨ گئے ہاسے
روح تاݨی رنگیج کے تیڈو ول ائے ہیں
روشنی ٹھوکر کھا کے اَکھ تئیں پُجدی ہے
اساں وی تُھݙکیج کے تیڈو ول ائے ہیں
کہیں وی ساڈا ٹھیک تلفُّظ نئیں کیتا
انت اساں وِڳڑیج کے تیڈو ول ائے ہیں
گئے ہیں دریا بُرد کرݨ ، تریہہ کئی واری
ہر واری بھَرکیج کے تیڈو ول ائے ہیں
جے تئیں بھوئیں دی کشش پُچاوݨ چاہندی ہئی
او تاݨی اُچھلیج کے تیڈو ول ائے ہیں
جِتھو خوف زوہیب ہا بُت برفِیجَݨ دا
اُتھو وی پَگھرِیج کے تیڈو ول ائے ہیں
محمد زوہیب اقبال