روویجے ہنج نہیں کھڑدی
،کِھلیجے ہنج نہیں کھڑدی
پتہ نئیں ہنج کُوں کیا تھی گۓ
ڈٙھکِیجے ہنج نہیں کھڑدے
اندر دے تھل تُوں پلکیں تئیں
،سفر سارا ھے پانڑی دا
ونِیجے ہنج نہیں کھڑدی
ولِیجے ہنج نہیں کھڑدی
میکوں تاں فرق نئیں ڈِسدا
،مٙنیوے تے رُسیمے وِچ
رُسیِجے ہنج نہیں کھڑدی
مٙنیِجے ہنج نہیں کھڑدی
ڈُکھے جِیونڑ تُوں اٙک تھی کے
،جو موۓ ھیں مر کے کل پئ اے
مرِیجے ہنج نہیں کھڑدی
جِویجے ہنج نہیں کھڑدی
جُدائی تاں جُدائی ھے
،تونڑیں سجنڑیں دی آمد دا
سُنڑیجے ہنج نہیں کھڑدی
ڈِکھیجے ہنج نہیں کھڑدی
جے "طارق" رُوح رٙہاونڑ لٙو
،کڈی لانویں دی چُنری کُوں
پٙوِیجے ہنج نہیں کھڑدی
لٙہیِجے ہنج نہیں کھڑدی
کلام سئیں مرحوم احمد خان طارق صاحب